വിഷുപ്പുലരി

ഉണർന്നിതാ മേടത്തിൻ ചന്ദനപ്പുലരിയീ-
നറുപൊൻകണിയെ വരവേൽക്കുവാനായ്
മേടത്തിൻ പൊൻവെയിൽ നാളമോയിന്നിതാ
വരവേൽപ്പൂവീപുതു പൊൻവിഷുപ്പുലരിയെ

ഒരു ചെറുകണിക്കൊന്ന പൂക്കുന്നിതാമെല്ലെ
നറുപൊൻവിഷുവിനെ തഴുകിലാളിക്കുവാൻ
വിഷുപ്പക്ഷി പാടുമാ രാഗമോ തേടുന്നു
തെന്നലിന്നലകൾതൻ ജീവരേണു

ചന്ദനത്തിൻ പുതുഗന്ധമോയിന്നിതാ
പൂത്തുലഞ്ഞീടുന്നു മനതാരിലായ്
അഞ്ജനക്കണ്ണനെ കണികാണ്മുയിന്നീ-
നറുവെണ്മയൂറും നയനങ്ങളാൽ

മഞ്ഞപ്പട്ടാടയുടുത്തൊരാ മേനിയെ
ഒരു ചിത്രക്കൂടിലായെന്നപോലോർക്കവേ
മയിൽ‌പ്പീലി പാറുമാ മോഹനരൂപമെൻ
മനതാരിൽ വിരിയുന്നു മെല്ലെ മെല്ലെ

ഒരുനറു തേജസ്സിനാലെയൊരുക്കുന്നു
നറുകണിയിന്നെനകതാരിലായ്
ഒരു പൊൻകണിയിന്നെനകതാരിലായ്...